ចិន៖ អាជ្ញាធរសុខាភិបាលចិន បានប្រកាសនៅថ្ងៃទី២៧ ខែធ្នូនេះថា ប្រទេសចិន នឹងលុបចោលនូវវិធានការចត្តាឡីស័កសម្រាប់អ្នកដំណើរដែលចូលទៅកាន់ប្រទេសចិន ដែលនឹងចាប់ផ្តើមអនុវត្តពីថ្ងៃទី០៨ ខែមករា ឆ្នាំ២០២៣តទៅ។ នេះគឺជាការបន្ធូរបន្ថយនូវវិធានការសុខាភិបាលមួយទៀត ក្រោយការតម្រូវឱ្យធ្វើចត្តាឡីស័កបានដាក់ចេញរយៈពេលជិត៣ឆ្នាំកន្លងទៅ។

គណៈកម្មាធិការសុខាភិបាលជាតិ (NHC) បានប្រកាសអំពីការបន្ធូរបន្ថយនូវវិធានការសុខាភិបាលបង្ការកូវីដ-១៩ តាមប្រព័ន្ធអនឡាញបន្ថែមថា សម្រាប់អ្នកដំណើរដែលមានបំណងចូលមកកាន់ប្រទេសចិនតាមរយៈជើងហោះហើរ គ្រាន់តែត្រូវធ្វើតេស្តតាមរយៈម៉ាស៊ីន PCR រយៈពេល ៤៨ម៉ោងមុនធ្វើដំណើរចូលដល់ប្រទេសចិនប៉ុណ្ណោះ។

សេចក្តីប្រកាសនេះគឺជាជំហានចុងក្រោយបង្អស់របស់រដ្ឋាភិបាលក្នុងការបន្ធូរបន្ថយវិធានការបង្ការកូវីដ-១៩ បន្ទាប់ពីបានប្រកាសលុបចោលនូវកាតព្វកិច្ចធ្វើតេស្ត និងបិទខ្ទប់នៅដើមខែធ្នូនេះ។ ក្នុងសេចក្តីប្រកាសដាច់ដោយឡែកមួយទៀត NHC បានប្រកាសចាត់ថ្នាក់កូវីដ-១៩ ចេញពីចំណាត់ថ្នាក់ឆ្លងកំពូលនៅក្នុង Grade A ចូលមកកាន់កម្រិតឆ្លង Grade B លំដាប់ទីពីរ។

គួរបញ្ជាក់ថា ក្រោយថ្ងៃទី០៨​ ខែមករា នេះគឺជាលើកដំបូងហើយដែលរដ្ឋាភិបាលចិនសម្រេចលើកលែងការធ្វើចត្តាឡីស័កចំពោះអ្នកដំណើរមកពីបរទេស ខណៈកាលពីខែមីនា ឆ្នាំ២០២០ កន្លងទៅរដ្ឋាភិបាលធ្លាប់បានដាក់នូវកាតព្វកិច្ចធ្វើចត្តាឡីស័កនៅមណ្ឌលចត្តាឡីស័ករយៈពេល ២សប្តាហ៍ និងក្រោយមកឡើងដល់ ៣សប្តាហ៍សម្រាប់អ្នកដំណើរពីក្រៅប្រទេស។ វិធានចាស់ការ​នេះ​មានផល​រំខាន​យ៉ាង​ខ្លាំង​ដល់​ភ្ញៀវទេសចរណ៍​អន្តរជាតិ និង​ការ​ធ្វើ​ដំណើរ​ធុរកិច្ច ដែល​ធ្វើ​ឱ្យ​រាំងស្ទះ​ដល់​សេដ្ឋកិច្ច​ដែល​បណ្តាលមក​ពី​ជំងឺ​កូវីដ​១៩៕